राज्यात सुरू असलेल्या मुसळधार पावसामुळे निर्माण झालेल्या गंभीर परिस्थितीच्या पार्श्वभूमीवर राष्ट्रवादी काँग्रेस (शरदचंद्र पवार) पक्षाच्या खासदार सुप्रिया सुळे यांनी राज्य सरकारवर टीका करत प्रमुख पायाभूत सुविधा प्रकल्पांचे तातडीने सुरक्षा ऑडिट करण्याची मागणी केली आहे. मिसिंग लिंक प्रकल्पावर दरड कोसळल्याची घटना अत्यंत चिंताजनक असल्याचे सांगत, इतक्या मोठ्या प्रकल्पात अशा प्रकारच्या घटना घडणे गंभीर असल्याचे त्यांनी नमूद केले.
सुळे म्हणाल्या की, मिसिंग लिंक प्रकल्पाचे उद्घाटन झाल्यानंतर सरकारकडून त्याचे मोठ्या प्रमाणावर कौतुक करण्यात आले होते. मात्र, आता त्या प्रकल्पावरील दरड कोसळल्याचे व्हिडिओ समोर येत असल्याने प्रकल्पाच्या सुरक्षिततेबाबत गंभीर प्रश्न उपस्थित होत आहेत. याशिवाय मुंबई, वसई-विरार, भांडूप आणि इतर अनेक भागांमध्ये मुसळधार पावसामुळे विविध दुर्घटना घडत असून, मानखुर्दमधील इमारत दुर्घटना, झाडे कोसळून झालेली जीवितहानी आणि पायाभूत सुविधांचे झालेले नुकसान यामुळे राज्यातील परिस्थिती अधिकच गंभीर बनल्याचे त्यांनी सांगितले.
यावेळी त्यांनी देवेंद्र फडणवीस यांनी तातडीने संपूर्ण परिस्थितीचा आढावा घेऊन राज्यातील महत्त्वाच्या पायाभूत सुविधा प्रकल्पांचे सुरक्षा व गुणवत्ता ऑडिट जाहीर करावे, अशी मागणी केली. या प्रकल्पांवर किती निधी खर्च करण्यात आला, सुरक्षा तपासण्या वेळेवर झाल्या होत्या का आणि नैसर्गिक आपत्तींचा विचार करून नियोजन करण्यात आले होते का, याबाबत सरकारने जनतेसमोर स्पष्ट माहिती द्यावी, असेही त्यांनी म्हटले.
मुंबई-पुणे द्रुतगती मार्ग, जुना मुंबई-पुणे महामार्ग, मिसिंग लिंक तसेच ताम्हिणी घाट हे प्रमुख मार्ग बंद झाल्यामुळे राज्यातील वाहतूक आणि संपर्क व्यवस्था विस्कळीत झाली असल्याची टीका सुळे यांनी केली. पर्यायी मार्गांची प्रभावी व्यवस्था नसल्याने नागरिकांना मोठ्या अडचणींचा सामना करावा लागत असल्याचे त्यांनी सांगितले. शाळा आणि महाविद्यालयांना सुट्टी देण्याचा निर्णय योग्य असला, तरी आपत्कालीन परिस्थितीत नागरिकांसाठी सुरक्षित वाहतूक आणि अखंड संपर्क व्यवस्था उपलब्ध राहणे तितकेच आवश्यक असल्याचे त्यांनी अधोरेखित केले.
महानगरपालिका आणि स्थानिक प्रशासनाच्या पूर्वतयारीवरही प्रश्न उपस्थित करत त्यांनी झाडांचे सर्वेक्षण, रस्ते रुंदीकरण करताना पर्यावरणीय परिणामांचा विचार, तसेच शहरांतील धोकादायक ठिकाणांची वेळेवर तपासणी झाली का, याची सखोल चौकशी करण्याची मागणी केली. सध्याच्या परिस्थितीत नागरिकांनी अनावश्यक प्रवास टाळावा, असे आवाहन करत सरकारने केवळ परिस्थितीचे स्पष्टीकरण न देता पारदर्शक चौकशी करून जबाबदारी निश्चित करावी, अशी मागणीही त्यांनी केली.