स्थानिक युवकांसाठी रोजगाराच्या संधी; मुख्यमंत्री मत्स्यसंपदा योजनेची प्रभावी अंमलबजावणी करण्याच्या सूचना
मुंबई (विशेष प्रतिनिधी):
पालघर जिल्ह्यातील वसई येथे मत्स्य प्रशिक्षण केंद्र उभारण्याच्या हालचालींना आता वेग आला आहे. या केंद्रासाठी तात्काळ जागा निश्चित करून आवश्यक जागा मागणीचा प्रस्ताव महसूल विभागाकडे पाठवावा, असे निर्देश मत्स्यव्यवसाय व बंदरे मंत्री नितेश राणे यांनी दिले आहेत.
मंत्रालयात आयोजित पालघर जिल्ह्यातील मत्स्यव्यवसाय विकास आणि मुरुड-जंजिरा परिसरातील कोळी समाजाच्या मागण्यांबाबतच्या बैठकीत ते बोलत होते. यावेळी आमदार स्नेहा दुबे, मत्स्यव्यवसाय आयुक्त प्रेरणा देशभ्रतार, पर्यटन विभागाचे सचिव संजय खंदारे आणि संबंधित वरिष्ठ अधिकारी उपस्थित होते.
मत्स्य प्रशिक्षण केंद्रातून मिळणार रोजगार
मंत्री नितेश राणे म्हणाले की, “वसई परिसरात मत्स्य प्रशिक्षण केंद्र सुरू झाल्यामुळे स्थानिक मच्छीमार युवकांसाठी रोजगाराच्या नव्या आणि व्यावसायिक संधी निर्माण होतील. या प्रकल्पाची अंमलबजावणी जलद गतीने होणे गरजेचे आहे. त्यासाठी प्रशासनाने समन्वयाने काम करावे.”
मुख्यमंत्री मत्स्यसंपदा योजनेचा प्रचार करा
राज्यातील मच्छीमार बांधवांच्या कल्याणासाठी 'मुख्यमंत्री मत्स्यसंपदा योजना' अत्यंत महत्त्वाची आहे. या योजनेचा लाभ तळागाळातील लाभार्थ्यांपर्यंत पोहोचवण्यासाठी जिल्हास्तरावर विशेष शिबिरांचे आयोजन करावे. मच्छीमार संस्थांना या योजनेच्या तांत्रिक आणि आर्थिक बाबींची सविस्तर माहिती देण्यात यावी, अशा सूचनाही त्यांनी यावेळी दिल्या.
कोळी समाजाच्या मागण्यांवर चर्चा
मुरुड-जंजिरा नगरपरिषद हद्दीतील कोळी समाजाच्या विविध समस्यांवरही या बैठकीत सविस्तर चर्चा करण्यात आली. यामध्ये प्रामुख्याने:
पायाभूत सुविधा: मच्छी सुकविण्यासाठी हक्काची जागा उपलब्ध करून देणे.
दुरुस्ती केंद्रे: जाळी आणि बोटी दुरुस्तीसाठी सुसज्ज केंद्रे उभारणे.
पर्यटन विकास: कोळी खेड्यांचा विकास करून पर्यटनाला चालना देणे.
'बॅक वॉटर' प्रकल्पासाठी जिल्हाधिकाऱ्यांची बैठक
मुरुड जंजिरा परिसरातील कोळी बांधवांच्या विकासासाठी आणि पर्यटनाला चालना देण्यासाठी 'बॅक वॉटर' प्रकल्पाचा प्रस्ताव पर्यटन व मत्स्यव्यवसाय विभागाकडे सादर करण्याचे निर्देश देण्यात आले. यासंदर्भात रायगड जिल्हाधिकाऱ्यांनी सर्व संबंधित विभागांची बैठक घेऊन कार्यवाही पूर्ण करावी, असे आदेश मंत्री राणे यांनी दिले.