मासळीच्या साठ्याचे जतन तसेच मच्छीमारांच्या जीवित व वित्त रक्षणाच्या उद्देशाने राज्य शासनाने महाराष्ट्राच्या सागरी जलक्षेत्रात पावसाळी मासेमारी बंदी लागू केली आहे. मत्स्यव्यवसाय विभागाच्या आदेशानुसार १ जून २०२६ ते ३१ जुलै २०२६ या कालावधीत (दोन्ही दिवस धरून) महाराष्ट्राच्या सागरी किनाऱ्यापासून १२ सागरी मैलांपर्यंत यांत्रिक व यंत्रचलित मासेमारी नौकांना मासेमारी करण्यास बंदी घालण्यात आली आहे.
नियम मोडल्यास 'या' कायद्यांतर्गत होणार कारवाई
मत्स्यव्यवसाय विभागाने जारी केलेल्या अधिकृत सूचनेनुसार, या दोन महिन्यांच्या कालावधीत समुद्रात मासेमारीसाठी जाणाऱ्या नौकांवर महाराष्ट्र सागरी मासेमारी नियमन अधिनियम (सुधारणा) २०२१ अंतर्गत अत्यंत कठोर कायदेशीर कारवाई करण्यात येणार आहे. यामुळे संभाव्य कायदेशीर अडचणी टाळण्यासाठी सर्व मच्छीमार बांधव, नौका मालक, तांडेल आणि खलाशी यांनी शासनाच्या या आदेशांचे काटेकोरपणे पालन करावे, असे आवाहन करण्यात आले आहे.
मत्स्यसंपत्तीचे संवर्धन आणि सुरक्षेचा उपाय
पावसाळी हंगामात समुद्र प्रचंड खवळलेला असतो, ज्यामुळे मासेमारी करताना मोठे अपघात होण्याची शक्यता नाकारता येत नाही. मच्छीमारांच्या सुरक्षेसोबतच, हा काळ विविध माशांच्या प्रजातींचा मुख्य प्रजनन (Breeding) कालावधी असतो.
या काळात मासेमारी बंद राहिल्याने मत्स्यसंपत्तीचे नैसर्गिक संवर्धन होण्यास मोठी मदत होते. या नियोजित बंदीमुळे भविष्यात मच्छीमारांना अधिक प्रमाणात आणि दर्जेदार मासळी उपलब्ध होऊन त्यांचा आर्थिक लाभ होणार असल्याचे मत मत्स्यव्यवसाय विभागाकडून व्यक्त करण्यात आले आहे.
समुद्रातील धोके टाळण्यासाठी आणि निसर्गाचे चक्र टिकवून ठेवण्यासाठी सर्व संबंधितांनी शासनाच्या नियमांचे पालन करून सहकार्य करावे, असे आवाहन मुंबई शहरचे मत्स्यव्यवसाय सहायक आयुक्त यांनी केले आहे.